Ministri i Jashtëm, Behgjet Pacolli, ka reaguar ndaj deklaratave të homologut të tij serb, Ivica Daçiq, i cili ndër të tjera tha se “Interpoli do të mbushet me fletëarreste për udhëheqësit e Kosovës”.
Përmes një postimi në Facebook, Pacolli është shprehur se Serbia mund të vazhdojë t’i keqpërdor institucionet ndërkombëtare, ashtu siç sipas Pacollit ka vepruar deri më tani.
Siç u shpreh Pacolli, “të turpëruar para botës janë ata që kanë kryer gjenocid mbi njerëzimin”.
Ky është postimi i plotë i Pacollit në Facebook:
E lexova një deklaratë të Dacicit, se gjoja Interpoli do të mbushet me fletarreste për udheheqësit e Kosovës.
Po, mund të ndodhe që Serbia të vazhdoj të keqpërdor edhe institucione ndërkombëtare, ashtu siq ka vepruar deri tani. Nuk është çudi, duke e ditur se kush është Daçiçi.
Njerëzit e Kosovës vetëm janë mbrojtur nga gjenocidi dhe nuk turpërohemi asnjëherë për veprimet tona.
Të turpëruar para civilizimit botëror janë ata që kanë kryer gjenocid.
E mira është që askush nuk do të këtë mundësi më të kryej gjenocid mbi popullin e Kosovës.
Asnjë qytetar i Kosovës nuk është i dënuar për vrasje. Asnjë qytetar i Kosovës nuk është i dënuar për masakra. Asnjë qytetar i Kosovës nuk ka bërë krime lufte, ngase lufta jonë ka qenë për mbijetesē.
Ndërsa bashkëideologet e Dacicit, nuk arrin ti numërojë kriminelët e luftës që kryen krimet e tmerrshme ne Kosovë e rajon!