Opinionisti, Rrahman Paçarizi, shprehet se i vjen keq ta krahasojë Avdullah Hotin me Albin Kurtin sepse sipas tij, Hoti ka qenë shumë më dinjitoz dhe ka mbërri një marrëveshje goxha të favorshme në Washington.
Në Rubikon të Klan Kosovës ai shtoi se Hoti ka mbërri një marrëveshje goxha të avancuar, dhe se edhe kjo marrëveshje që Kurti do ta nënshkruajë, ndoshta jo nesër, por që do ta nënshkruajë, kryeministri i tanishëm po pranon diçka që e ka çuar në një fazë të caktuar edhe Hoti, edhe Mustafa, edhe Thaçi.
“Pra, të gjithë njerëzit që ky jo vetëm që i ka kritikuar, por të cilëve ua ka vështirësuar jetën bashkë me atë të qytetarëve të Kosovës, duke i vu qytetarët në dilema e në dyshime se dikush në Kosovë është duke bërë tradhti kombëtare, se dikush është duke shkuar në Bruksel e në Uashington me thika për ta ndarë Kosovën, thuajse Kosova është ndonjë copë e pites ose torte, d.m.th të njëjtën gjë po e bën Kurti”.
“Por këtu ka një dallim, opozita e tashme është shumë më normale, më konstruktive dhe shumë më e mësuar, më e dijshme e më e njohur me praktikat ndërkombëtare dhe të negocimit e të dialogut së ç’është Kurti, i cili i ka humbur të gjitha kartat që i ka pasur në dispozicion, përfshirë edhe kartën e personit që është më i dijshmi dhe më inteligjenti. Dikush që është kaq i dijshëm dhe kaq inteligjent nuk thotë ‘unë po pranoj diçka të cilën as s’e kam bërë vet, por po ma ofrojnë miqtë të cilët unë i kam sharë deri tani”, deklaroi Paçarizi.
