Analisti politik, Rrahman Paçarizi, duke i komentuar gjetjet e raportit të Departamentit Amerikan të Shtetit për të Drejtat e Njeriut, tha që e sheh si më shqetësues faktin që problemet me lirinë e medias janë intensifikuar.
“Për mua më shqetësues se vetë raporti i DASh-it, që është pak më i ashpër se i vitit të kaluar, është fakti që gjetjet e këtij raporti po vazhdojnë me intensitet të shtuar, në periudhën e cila del përtej periudhës që mbulon ky raport. Problemet me lirinë e medias janë intensifikuar, ku i kemi pasë disa situata shumë të rënda të sulmeve ndaj medias duke i cilësuar mediat si ” grupe të organizuara kriminale”, ka thënë Paçarizi duke aluduar në deklaratat e Prindon Sadriut dhe Luan Dalipit.
Paçarizi në Rubikon në Klan Kosova, përmendi edhe çështjen e emërimeve politike në sistemin arsimor të Kosovës.
“Këtu nuk u përmend çështja e vazhdimit të emërimeve politike në sistemin arsimor të Kosovës, ku mësuesit dhe drejtorët e shkollave vazhdojnë të emërohen politikisht. Jo që nuk janë emëruar më përpara, por kjo ka qenë një nga kritikat që VV-ja u bënte qeverive të kaluara”.
“Çështja me e dhimbshme është qasja e pushtetit ndaj gjyqësorit, një qasje që sa vjen e po ashpërsohet edhe më shumë. Demokracia në një vend rrezikohet nga shpërfillja dhe kontestimi i vendimeve të sistemit të drejtësisë. Në Kosovë, kjo po ndodhë në vazhdimësi. VV tani në qeveri i jep vetes të drejtë që të bëjë interpretime të vendimeve të sistemit të drejtësisë përshirë edhe Gjykatës Kushtetuese”.
Paçarizi tha që ministrja e Arsimit, Arbërie Nagavci, e kontestoi publikisht vendimin e Gjykatës Kushtetuese.
“Ministrja e Arsimit, për herë të parë në Kosovë e konteston publikisht vendimin e Gjykatës Kushtetuese. Në Kosovë, dy presidentë kanë rënë për shkak të vendimit të Gjykatës Kushteuese”, tha ai.
