Presidentja e vendit, Vjosa Osmani, ka kujtuar 26-vjetorin e Masakrës së Kralanit në Gjakovë.
Osmani tha se regjimi gjenocidal i Serbisë, pasi që i rrëmbeu nga kolonat e të zhvendosurve, vrau dhe dogji 87 civilë, ndërsa 45 të tjerë i ekzekutoi brutalisht në Çupevë të Epërme dhe të Poshtme, Gllarevë, Përçevë, Sverkë dhe Gremnik të Klinës.
“Këto ngjarje janë dëshmi e përpjekjeve për shfarosje dhe spastrim etnik. 11 viktima të identifikuara nga Malisheva, Skenderaj dhe Klina nga Masakra e Kralanit u rivarrosën dje dhe sot, në përvjetorin e masakrës, në vendlindjet e tyre”.
“Pas 26 vitesh pritjeje, Gjakova dhe e gjithë Kosova nderoi 11 viktima të Masakrës së Kralanit, e cila është njëra ndër krimet më monstruoze të forcave gjenocidale të Serbisë”, tha Osmani, transmeton Klankosova.tv.
Më tej, e para e shtetit u shpreh se e kanë obligim, që në emër të së ardhmes të kërkojnë llogari për të kaluarën.
“Drejtësia për ta ishte, është dhe do të jetë detyrë shtetërore, kombëtare dhe njerëzore. Kosova nuk harron! Lavdi për të gjithë martirët dhe të rënët për lirinë e vendit”, shkroi ajo.
