Osmani: Angazhimi im për barazinë e të gjitha komuniteteve në Kosovë është i pandërprerë

Presidentja e Kosovës, Vjosa Osmani, ka marrë sot pjesë në takimin e organizuar për fundvit nga Këshilli Konsultativ për Komunitete, me ç’rast, i falënderoi anëtarët e Këshillit për angazhimin e tyre në përmirësimin dhe forcimin e të drejtave të komuniteteve në Kosovë.

Në llogarinë e saj në Facebook, ajo ka shkruar se angazhimi i saj për barazinë e të gjitha komuniteteve në Kosovë është i pandërprerë.

“Në veçanti, do të doja të shpreh mbështetjen time të plotë për propozimin e fundit për ndryshime në procedurat e rekrutimit të pjesëtarëve të komuniteteve joshumicë. Është një hap i rëndësishëm drejt përmirësimit të pjesëmarrjes së tyre në institucionet publike, dhe do të jem në krye të përpjekjeve për zbatimin e këtij ndryshimi ligjor. Pra Barazi në Punësim për te gjithë pa dallim, sepse kjo është edhe prioritet i imi, kjo duhet të jetë edhe kauzë e shoqërisë sonë në përgjithësi”, ka thënë presidentja në fjalimin e saj.

Sipas saj, gjatë këtij viti, zyra e saj ka qenë e përkushtuar në dialogun dhe bashkëpunimin me institucionet për t’i trajtuar rekomandimet e Këshillit.

“Ju siguroj se ky bashkëpunim do të vazhdojë edhe në vitin e ardhshëm dhe se do t’i japim shtytje shtesë implementimit të tyre. Në përfundim, do të doja të theksoja se angazhimi im për promovimin dhe barazinë e të gjitha komuniteteve në Kosovë është i pandërprerë. Së bashku me Këshillin dhe Sekretariatin, do të punojmë me përkushtim për një shoqëri më të drejtë dhe më të përfshirë për të gjitha komunitetet”, ka thënë ajo.

Më tej ajo ka shtuar se ky që po e lëm pas ka qenë një vit i mbushur me sfida dhe arritje, por bashkëpunimi dhe përkushtimi kanë sjellë shumë suksese dhe momente të mrekullueshme.

“Le të marrim këtë kohë për të reflektuar mbi të gjitha përvojat dhe përfitimet e vitit që po mbyllet. Uroj që kujtimet pozitive dhe sukseset tuaja të bëhen burim frymëzimi për vitin e ardhshëm. Faleminderit për kontributin tuaj të pazëvendësueshëm dhe për bashkëpunimin e jashtëzakonshëm gjatë këtij viti. Le të vazhdojmë të punojmë së bashku për një të ardhme më të ndritshme dhe të suksesshme”, ka shtuar Osmani.

Pas fjalimit të Presidentes, zëvendëskryesuesi Petar Dordevic i dorëzoi Presidentes Osmani Mirënjohjen në emër të Këshillit “Për lidershipin e dëshmuar në avancimin e të drejtave të komuniteteve në Kosovë”.