Oda e Mjekëve të Kosovës i ka reaguar ashpër zëvendëskryeministrit Besnik Bislimi, i cili tha se mjekët kosovarë po ikin nga vendi shkaku se mjekët gjermanë e braktisin Gjermaninë.
Përmes një reagimi në faqen zyrtare në Facebook, Oda e Mjekëve ka thënë se ky është mohim i gjendjes dhe është shprehur e zhgënjyer me këtë deklaratë.
“Duke qenë se si organizatë profesionale, e cila përmes kompetencave ligjore dhe organeve administrative vrojtojmë gjendjen e personelit mjekësor, Oda e Mjekëve të Kosovës shprehë zhgënjim ndaj deklarimeve të zv.Kryeministrit, z.Besnik Bislimi, i cili në takim me komisionin përgjegjës parlamentar ka bërë krahasimin e ikjes së mjekëve kosovarë me mjekët gjermanë.
Mirëpo, në kushtet që punojnë mjekët kosovar, pasigurinë sociale të cilën e ballafaqojnë çdo ditë, vështirësitë nga më të ndryshmet, përfshirë këtu edhe rrezikshmëria në vendin e punës, të thuhet se mjekët kosovar migrojnë në Gjermani për shkak se mjekët gjerman braktisin Gjermaninë, është mohim i gjendjes së rëndë kronike dhe akute njëkohësisht”, thuhet në reagim.
Sipas Odës, arsyet pse mjekët po e braktisin Kosovën janë kushtet e punës dhe pagat.
“Neglizhenca dhe nënvlerësimi i vazhdueshëm institucional që i është bërëe komunitetin mjekësor për vite me rradhë është shkak që sot vije deri te injorimi i fakteve të rëndësishme në sektorin e shëndetësisë, siç është zhdukja dhe absorbimi i jashtëm i personelit shëndetësor në përgjithësi. Braktisja e mjekësve kosovar ka disa arsye themelore, e ndër to si më të rëndësishme janë kushtet e punës dhe ato socio-ekonomike që kanë të bëjnë me lartësinë e pagës”, thuhet në reagim.
Ndryshe, Bislimi, ka vlerësuar se shkuarja e mjekëve të Kosovës në Gjermani ndodh për shkak të largimit të mjekëve gjermanë nga po ky vend.
Këto komente ai i bëri para Komisionit për Integrime Evropiane kur u përmend edhe largimi i mantelbardhëve kosovarë nga vendi.
“Kanë ikur mjekët gjithmonë në Kosovë dhe do të ikin gjithmonë. Por, a e dini pse shkojnë mjekët në Gjermani? Jo pse është rritur popullsia e Gjermanisë, por se mjekët gjermanë ikin prej Gjermanisë”, ka thënë Bislimi.
“Do të thotë edhe prej Gjermanisë ikin mjekët dhe shtrohet nevoja që me ardhë mjekët prej Ukrainës, Kosovës, Italisë”.
