Rreth 500 persona rezultojnë të zhdukur nga mbytja e anijes me emigrantë në Greqi. Autoritetet shpëtuan 104 njerëz dhe gjetën 78 trupa menjëherë pas tragjedisë.
Sipas raportimeve nga mediat e huaja, dëshmitarët thonë se në anije ndodheshin 400-700 njerëz, e cila u përmbys dhe u fundos rreth 50 milje nga qyteti jugor bregdetar i Pylos, ndërsa po udhëtonte nga Libia në Itali.
Një punonjëse sociale greke, e cila kujdesej për disa nga të mbijetuarit, tha për Sky News se ajo kishte dëgjuar se uji kishte mbaruar në peshkarexhë disa ditë para se ajo të fundosej, duke i detyruar pasagjerët të pinin urinën e tyre dhe të thithnin ujë nga frigoriferët që shkriheshin.
Shumë prej tyre janë duke pësuar trauma të rënda mendore, thonë ata.
Ajo kujtoi një të mbijetuar i cili i tha se “për dy orë ai po notonte i rrethuar nga trupat e vdekur të fëmijëve dhe një i ri rreth të 20-tave i cili “donte të bënte vetëvrasje, donte të hidhej në det dhe të vriste veten sepse nuk mundi më”.
Të mbijetuarit janë transferuar në një qendër imigracioni në Greqinë qendrore. Vëmendja e medias është zhvendosur tek zyra e Rojës Bregdetare Helene në portin e Kalamatës, pasi tani po lindin pyetje nëse ata mund të kishin bërë më shumë për të shmangur katastrofën.
Një gazetë greke citoi një burim anonim që pretendonte se një litar ishte ngjitur në varkë rreth tre orë para se ajo të përmbysej.
Ka gjithashtu pyetje se pse nuk u bë asgjë për të shpëtuar të paktën disa nga pasagjerët kur ishte e qartë se anija ishte e mbipopulluar në mënyrë të rrezikshme me emigrantë.
Roja bregdetare ka thënë më parë se ka vepruar në përputhje me ligjin ndërkombëtar sepse anija ishte në ujërat ndërkombëtare. Nëntë burra egjiptianë, të moshës 20 deri në 40 vjeç, janë arrestuar me akuzat për kontrabandë dhe pjesëmarrje në organizatë kriminale.