Njohësi i Integrimeve Evropiane, Artan Murati, në një prononcim për Telegrafin ka sqaruar zhvillimet që kanë ndodhur sot në Parlamentin Evropian rreth çështjes së liberalizimit të vizave për Kosovën.
Sipas tij, Komisioni për të drejta civile, drejtësi dhe punë të brendshme i Parlamentit Evropian (PE), sot ka dhënë rekomandim për liberalizim të vizave për Kosovën dhe Gjeorgjinë.
“Eurodeputetët e këtij Komisioni (LIBE Committee) kanë aprovuar raportin e raportueses për liberalizimin e vizave për Kosovën, Tanja Fajon, i cili bënë thirrje që Kosovës t’i hiqet regjimi i vizave për zonën Schengen sapo të përmbushen dy kushtet e mbetura, të kërkuara nga Komisioni Evropian për Kosovën”, ka theksuar Murati.
Ai ka thënë se raporti i Tanja Fajon u miratua me 25 vota pro, 24 vota kundër dhe 2 abstenime, duke shtuar “se sa i përket hapave të ardhshëm, Komisioni për të drejta civile, drejtësi dhe punë të brendshme do të prezantojë Raportin dhe votimin për në seancën e ardhshme plenare të Parlamentit Evropian, ku pastaj ky Raport duhet të miratohet nga të gjithë eurodeputetët, për të marrë aprovimin final të PE-së për liberalizimin e vizave për Kosovën”.
“Megjithatë, një gjë e tillë nuk pritet të ndodhë derisa Kosova të mos përmbushë edhe dy kriteret e fundit të mbetura për liberalizim: ratifikimin e marrëveshjes për demarkacionin me Malin e Zi si dhe luftimin e korrupsionit dhe krimit te organizuar. Përveç Parlamentit, edhe Këshilli i Ministrave i BE-së duhet t’i jap dritën e gjelbër liberalizimit, para se ky vendim te bëhet i plotfuqishëm”, ka sqaruar Murati.
Ndryshe, Komiteti LIBE i Parlamentit Evropian nuk i ka dhënë dritën e gjelbër për fillimin e negociatave të Parlamentit me Këshillin e BE-së për vendimin formal për liberalizimin e vizave për Kosovën.
Megjithatë, komisioni ka mbështet raportin e raportueses së Bashkimit Evropian për Liberalizimin e Vizave për Kosovën, Tanja Fajon, gjë që shihet si hap pozitiv.
Ky komision është procedura e fundit përpara se Parlamenti Evropian të vendosë nëse qytetarët e Kosovës mund të udhëtojnë pa viza në vendet e BE-së.
