Takimi i radhës ndërmjet Kryeministrit Albin Kurti dhe presidentit serb Aleksandar Vuçiq, do të zhvillohet më 2 maj në Bruksel dhe të dy palët ranë dakord të martën për krijimin e një komiteti të përbashkët për të mbikëqyrur zbatimin e marrëveshjes së rënë dakord së fundmi.
Peter Stano, zëdhënësi i Përfaqësuesit të Lartë për Punë të Jashtme dhe Politikë të Sigurisë, Josep Borrell, njoftoi të martën se BE – si ndërmjetës në dialogun ndërmjet Prishtinës dhe Beogradit – si palë në dialogun për normalizimin e marrëdhënieve të tyre, – themeloi sot Komitetin e Përbashkët Monitorues për zbatimin e Marrëveshjes për rrugën e normalizimit ndërmjet Kosovës dhe Serbisë dhe aneksin e zbatimit të saj.
Lajçak do të kryesojë komitetin e përbashkët
Ky komitet është themeluar 30 ditë pas takimit në Ohër, ku është bërë e ditur se të dyja palët kanë rënë dakord për një plan për zbatimin e marrëveshjes. Takimi i parë i atij komisioni është caktuar pas “takimit të radhës në kuadër të dialogut të nivelit të lartë, i cili është caktuar për 2 maj në Bruksel”, tha Stano.
Komiteti i përbashkët i monitorimit do të kryesohet nga përfaqësuesi special i BE-së për dialogun ndërmjet Prishtinës dhe Beogradit dhe çështje të tjera rajonale të Ballkanit Perëndimor, Miroslav Lajçak. Kosova do të përfaqësohet nga ambasadori në Bruksel, Agron Bajrami, ndërsa Serbi nga kryenegociatori Petar Petkoviq./PrishtinaPress/
