Komunikimet me qëllim ngacmimi apo frikësimi, për t’i shkaktuar dëm një personi përbëjmë vepër penale.
Kushdo që vë dikë në frikë, duke i shkaktuar shqetësim të madh emocional dënohet me gjobë ose me burgim deri në 3 vjet.
Një rast i tillë është denoncuar të dielën në Polici, nga një avokat, i cili ka raportuar se derisa ka qenë në vendin e tij të punës ka pranuar mesazhe ngacmuese.
Burimet nga Prokuroria kanë bërë me dije se personi që dyshohet për këtë rast i ka dërguar viktimës mesazhe përmes një rrjeti social.
Sinjali mëson se viktima ka kërkuar ndihmën e Policisë për shkak të shqetësimit që i është shkaktuar, si dhe ka deponuar dëshmi lidhur me rastin.
Pas dhënies së deklaratës së tij dhe përfundimit të procedurave policore, Prokurori i Shtetit ka urdhëruar inicimin e rastit për veprën penale “Ngacmim” dhe ndërmarrjen e veprimeve hetimore që të sigurohet prezenca e personit të dyshuar./PrishtinaPress/
