India, sipas të gjitha parashikimeve, pritet të bëhet sot [e premte] vendi më i populluar në botë, të cilin Kina e mbajti për dekada.
Përballë një popullsie të madhe dhe në rritje prej më shumë se 1.4 miliardë banorësh, shërbimi i planifikimit familjar i Indisë është nën presion për të mbajtur një normë lindjeje në rënie.
Parashikimi i OKB-së thotë që më 14 prill, popullsia e Indisë do të arrijë në 1.425.775.850 – një numër që do të rrëzojë Kinën nga pozicioni i saj prej kohësh si vendi më i populluar në botë.
Popullsia e saktë e Indisë sot nuk dihet (përditësimi i regjistrimit dhjetëvjeçar të vitit 2021 është shtyrë për një kohë të pacaktuar për shkak të pandemisë), por të gjitha shenjat tregojnë për rritje eksponenciale. Ndërsa shkalla e rritjes së popullsisë së Kinës ka filluar të bie, ajo e Indisë vazhdon të rritet.
India i ka shtuar rreth 210 milionë popullsisë së saj që nga regjistrimi i fundit 12 vjet më parë – pothuajse aq njerëz sa jetojnë në Brazil. Që nga viti 2020, India ka afërsisht një milion banorë më shumë çdo muaj.
Por gjatë të njëjtave dekada që rritja e popullsisë së Indisë u rrit, normat e lindshmërisë ranë. Në vitin 1964, gratë indiane kishin mesatarisht gjashtë fëmijë, sot ato kanë pothuajse dy, pjesërisht për shkak të shërbimit të planifikimit familjar të qeverisë, për të cilin India pretendon se ishte vendi i parë që e ofroi atë kur u lansua më 1952.
Sipas parashikimeve, popullsia e Indisë do të vazhdojë të rritet në dekadat e ardhshme. Projeksioni i OKB-së për “variantin e mesëm” e vendos kulmin e rritjes në 1.7 miliardë njerëz më 2064.
Kjo rrjedh kryesisht nga fakti se pothuajse gjysma e popullsisë indiane është nën 25 vjeç dhe do të kenë fëmijët e tyre në vitet e ardhshme.
Është e rëndësishme të përmendet se në momentin që India të bëhet vendi më i populluar në botë, do të ketë ndryshime reale dhe simbolike për këtë vend.
Kina do të mbetet një fuqi e madhe ekonomike, e cila kërcënon statusin e Shteteve të Bashkuara të Amerikës si superfuqi, por nuk do të jetë më kombi më i madh në botë. Sipas tendencave aktuale, hendeku i popullsisë do të vazhdojë të zgjerohet dhe ndikimi i Kinës dhe Indisë do të varet nga një sërë faktorësh të tjerë, si investimet dhe qeverisja. Kjo do të thotë se demografia nuk është çelësi./PrishtinaPress/