David Cameron ka takuar Benjamin Netanyahun dhe presidentin izraelit, Isaac Herzog, gjatë një vizite në Izrael, duke shprehur shpresën se armëpushimi i përkohshëm i planifikuar me Hamasin do të ishte një “mundësi për të nxjerrë pengjet dhe për të marrë ndihmë në Gaza”.
Kryeministri izraelit i tha sekretarit të ri të jashtëm të Mbretërisë së Bashkuar se parakushti për paqen në Lindjen e Mesme ishte çrrënjosja e asaj që Netanyahu e quajti “kulti terrorist gjenocidal” Hamas. Vërejtjet e tij dhanë përshtypjen se Netanyahu aktualisht nuk është i interesuar për asgjë, përveç një zgjidhje ushtarake për të ardhmen e sigurisë së Izraelit.
Vizita e Cameron në Jerusalem dhe në Ramallah, selinë e Autoritetit Palestinez, erdhi në një ditë tjetër dramatike rreth lirimit të pengjeve dhe të burgosurve politikë palestinezë.
Netanyahu këmbënguli se Izraeli do të vazhdojë me planet e tij për të shkatërruar Hamasin, duke thënë:
Ne do të vazhdojmë me qëllimet tona të luftës, domethënë për të çrrënjosur Hamasin, sepse Hamasi tashmë ka premtuar se ata do ta bëjnë këtë përsëri dhe përsëri dhe përsëri. Ata janë një kult terrorist gjenocidal. Nuk ka asnjë shpresë për paqe mes Izraelit dhe palestinezëve, midis Izraelit dhe shteteve arabe, nëse nuk e zhdukim këtë lëvizje vrastare që kërcënon të ardhmen e të gjithëve ne.
Kuptohet se Cameron diskutoi ndikimin e konfliktit te civilët dhe nevojën për të marrë të gjitha masat e mundshme për të minimizuar viktimat civile dhe u kërkoi izraelitëve të ndërmarrin veprime për t’i dhënë fund dhunës së kolonëve në Bregun Perëndimor. Sekretari i Jashtëm i Mbretërisë së Bashkuar theksoi nevojën për të përdorur pikën kufitare Kerem Shalom për të rritur skanimin dhe inspektimet për të futur më shumë kamionë në Gaza.
Netanyahu nuk zbrapset: Do të vazhdojmë me qëllimet tona të luftës, për të çrrënjosur Hamasin
