Një ekspozitë që flet për rolin e babait në familje është hapur sot në Prishtinë. Aty u bënë edhe krahasime për baballarët e sotshëm me të gjeneratave të dikurshme. Nuk janë vetëm nënat që duhet të kujdesen për fëmijët e tyre.
Kjo ishte motoja e ekspozitës “Baballarët e Kosovës”, e cila u hap në Ditën Ndërkombëtare të Familjes në Prishtinë, në kuadër të projektit “Përfshirja e burrave në atësi”, përcjell albinfo.ch.
“Për familjen duhet të kujdesen si burrat, ashtu edhe gratë”, ka thënë Bujar Fejzullahu, drejtor ekzekutiv i Rrjetit të Edukatorëve Bashkëmoshatarë “PEN”. Po ashtu është publikuar edhe libri me të njëjtin emër.
Organizatori i këtij projekti, Kadri Gashi, tha se me këtë ekspozitë dhe me këtë libër dëshirojnë të sjellin diçka më pozitive, përkundër vështirësive e problemeve ekonomike që has kjo shoqëri. “Është goxha emocion i mirë kjo ditë. Mbi 25 mijë familje kanë asistencë sociale në Kosovë. Ka shumë vajza të reja që nuk kanë mundësi të shkollohen, papunësia është e madhe. Duke e parë këtë, ne si organizatë me këtë ekip jemi munduar të sjellim diçka më pozitive”, tha Gashi.
E Ilir Kurtishi, njëri ndër baballarët pjesëmarrës në libër, tha se shpreson që organizime të tilla do të ndihmojnë në vetëdijesimin e të gjithëve për rëndësinë që ka kujdesi për fëmijët nga të dy prindërit.
