Policia e Kosovës ka njoftuar se në pikën kufitare Jarinjë ka ndaluar një person me iniciale M.J i cili ishte në kërkim.
Sipas njoftimit personi kërkohej për krim të organizuar, marrje e mitos dhe keqpërdorim i autorizimit.
“Sot, në orët e mbrëmjes në pikë kalimin kifitar Jarinje, është ndaluar një mashkull kosovar (M.J.), mbi bazën e urdhërarrestit aktiv të lëshuar nga Gjykata Themelore. I dyshuari kërkohej mbi dyshimet e bazuara për përfshirje në veprat penale si; krim i organizuar, marrje e mitos dhe keqpërdorim i autorizimit.”, thotë Policia e Kosovës.
Mirëpo, portali Kosova online ka shkruar se bëhet fjalë për një serb nga Leposaviqi, ish-pjesëtar i policisë, por pa specifikuar se cili.
Bashkëshortja e të arrestuarit ka thënë për këtë media se M.J është marrë nga pjesëtarët e Policisë së Kosovës në drejtim të pjesës veriore të Mitrovicës.
“Për këtë rast ka raportuar edhe Shërbimi Publik i Serbisë, duke treguar emrin dhe mbiemrin e plotë të personit të arrestuar, si dhe informacionin e saktë se ai është ish-pjesëtar i Policisë së Kosovës”, thuhet në artikullin e tyre.
