Ndonëse kanë kaluar dy muaj nga nënshkrimi i marrëveshjes së Komunës së Prishtinës me kompaninë “Iveco” për furnizimin me 51 autobusë të rinj – të cilët do të shfrytëzohen për transportin publik në kryeqytet – prishtinasit vazhdojnë ballafaqohen më vështirësi në qarkullim.
Erzen Vraniqi, nga zyra për informim në Komunën e Prishtinës, ka sqaruar për Telegrafin se kompania “Iveco”, në bazë të marrëveshjes obligohet që brenda 120 ditësh t’i sjellë 15 autobusët e parë.
“Autobusët tjerë do të arrijmë sapo të përfundojnë. Pastaj, se si do t’i fusë trafiku urban në funksion, këtë nuk mund të them, sepse nuk e di saktë planin e punës së tyre”, ka shtuar Vraniqi.
Vlera e këtij projekti që arrin shumën e 13 milionë eurove, ishte zgjidhur – pas një debati të gjatë në mes Komunës së Prishtinës dhe Qeverisë së Kosovës – nëpërmjet një kredie nga Banka Evropiane për Rindërtim dhe Zhvillim (BERZH). Me 42 vota pro, asnjë kundër, dhe më një marrëveshje të të gjitha grupeve parlamentare në Kuvendin Komunal në Prishtinë, ishte miratuar kërkesa e Komunës së Prishtinës për blerjen e këtyre autobusëve. Me 7 shtator Komuna e Prishtinës ka nënshkruar kontratën me kompaninë fituese për furnizimin me autobusët për Trafikun Urban.
