Nënkryetari i Komunës së Skenderajt, Nuredin Lushtaku, dhe drejtorët komunalë, kanë pritur të dielën në takim Benito Mares nga Shtetet e Bashkuara të Amerikës (ShBA), i cili është ideatori dhe financuesi kryesor i projektit për ndërtimin e Kompleksit të Dëshmorëve në Marinë.
Gjatë bashkëbisedimit, nënkryetari Lushtaku e ka falënderuar mikun amerikan për realizimin e këtij projekti, i cili ka mundësuar që të gjithë dëshmorët e Drenicës të prehen të qetë në një vend.
Lushtaku ka thënë se Komuna e Skenderajt dhe të gjitha familjet e dëshmorëve janë falënderuese dhe të kënaqur me këtë projekt, ku homazhet për familjarët e tyre trima tashmë i bëjnë në Kompleksin e Dëshmorëve, në një hapësirë që po mirëmbahet shumë mirë, ashtu siç edhe e meritojnë heronjtë e Ushtrisë Çlirimtare të Kosovës.
Në shenjë falënderimi për kontributin e dhënë, në emër të kryetarit Bekim Jashari, nënkryetari Lushtaku i ka dhuruar Benito Mares një dhuratë, ndërkaq në emër të tij personal i ka dhuruar stemën e UÇK-së me figurat e ndritura të familjes Jashari: Shaban, Adem e Hamëz Jashari.
Me këtë rast, Mares ka thënë se ndihet i nderuar me pritjen, shoqërimin miqësor dhe dhuratat e pranuara, të cilat siç ka thënë ai do t’i vendos me kënaqësi në ambientin e tij shtëpiak. Benito Mares ka bërë me dije se do të fillojë edhe një projekt tjetër, i cili ka të bëjë me dokumentimin e luftës dhe kompleksit të UÇK-së në Marinë.
Ai ka thënë se do t’i mbetet merak që nuk do të mund të marrë pjesë në ceremoninë e shënimit të 20-vjetorit të çlirimit të Skenderajt, por ka uruar të gjithë për këtë përvjetor jubilar.
Gjatë qëndrimit në Skenderaj, Moresi ka vizituar edhe Kompleksin e Dëshmorëve në Marinë, dhe ka mbetur i kënaqur me përfundimin e procesit të rivarrosjes së dëshmorëve të Drenicës, si dhe me mirëmbajtjen e hapësirave brenda tij.