Kryetari i LDK-së, Isa Mustafa ka thënë se vënia e dialogut me Serbinë në kontekstin e Dhomave të Veçanta të Gjykatës Speciale, është e rrezikshme vetëm të mendohet e jo të ndodhë.
Përmes një statusi në Facebook, ka akuzuar analistët Carl Biltd dhe Volfgang Petrich, duke thënë se nuk shkohet për të dialogur në Bruksel e Uashington me logjikën e tyre.
“Vënia e dialogut me Serbinë në kontekstin e Dhomave të Veçanta të Gjykatës Speciale, është e rrezikshme vetëm të mendohet e jo të ndodhë. Gjykata duhet të jetë e pavarur në ndarjen e drejtësisë. Ashtu siç duhet të jetë dialogu i pavarur. Është vështirë të niset dikush në rrugë për Washington apo për Bruksel për të dialoguar, me logjikën e komenteve dhe analizave të disa gazetarëve dhe analistëve të jashtëm, edhe me logjikën e Carl Biltdit dhe Volfgang Petrichit”, thotë Mustafa.
Kreu i LDK-së konsideron se “logjika e parandalimit të ndonjë marrëveshje në Washington apo në Bruksel, nuk është dhe do duhej të jetë logjikë e një Gjykate, sepse thotë se ajo duhet të ndajë drejtësi, për çfarë është themeluar”.
Sipas Mustafës, “nëse nuk do të ishte kështu, atëherë pa u nisur në rrugë për të shkuar në dialog, duhet t’ia marrësh hallallin familjes”.
“Nëse nuk do të ishte kështu, atëherë pa u nisur në rrugë për të shkuar në dialog, duhet t’ia marrësh hallallin familjes. Ec e bëhu trim”, shkroi Mustafa, njofton Telegrafi.
