Analisti politik Imer Mushkolaj ka kritikuar kryeministrin Albin Kurti për situatën në veri.
Në profilin e tij në “Facebook”, ai ka shkruar se i pari i qeverisë po flet si analist dhe nuk po e tregon nëse e ka një plan se si t’i qaset situatës së krijuar në atë pjesë të vendit.
“Kryeministri po thotë se serbët në veri nuk i kanë problem vendimet e qeverisë për targat, por nga ata që e kanë problem ligjin. Sipas tij, atyre që po urdhërojnë braktisjen e institucioneve u pengon ligjshmëria dhe kushtetutshmëria, luftimi i kriminalitetit dhe i korrupsionit. Pajtohem. Vetëm se Kurti po flet si analist dhe nuk po e dimë nëse e ka një plan se si t’i qaset situatës së krijuar në veri. Me analiza merren debatet televizive, qysh tha dje vetë Kurti, e qeveria duhet të veprojë”, ka shkruar Mushkolaj.
Në mbledhjen e sotme të Qeverisë, kryeministri Albin Kurti ka folur për situatën në veri.
Ai ka thënë se problem për serbët në veri, janë sulmet me bomba e djegia e veturave.
“Presioni dhe sulmet ndaj qytetarëve në veri, janë dëshmia se çka prodhon mungesa e sundimit të ligjit. Problemi i tyren nuk janë problemet tona, as afatet. 1 mijë e 12 vërejtje janë lëshuar deri sot në mëngjes. Asnjë incident i shënuar e asnjë ankesë. Problemi i tyre janë sulmet me bomba, djegiet e veturave, trysnitë e kërcënimet pa afat që kanë problem me ligjin”, tha Kurti./Prishtinapress/