“Vetëmenaxhim”, “Asociacion” apo “Zajednicë”?
Për analistin Imer Mushkolaj që të tria termet nënkuptojnë autonominë.
I ftuar në “Debat Plus” të RTV Dukagjinit, Mushkolaj iu drejtua deputetit të Lëvizjes Vetëvendosje, Arbër Rexha duke deklaruar se i njëjti po përpiqet të hedh hi syve duke thënë se Asociacioni i Komunave me shumicë serbe përfshihet në marrëveshjen e arritur në Ohër.
“Quajeni si të doni. Po deshët ‘vetëmenaxhim’, ‘vetadministrim’, ‘Asociacion’ apo ‘Zajednicë’. Zonjë dhe zotëri bëhet fjalë për autonomi. Se për çfarë autonomie bëhet fjalë është çështje tjetër…thelbi qëndron tek autonomia që do të ketë komuniteti serb në Kosovë”, ka deklaruar ai.
Mushkolaj ka thënë se esenca qëndron tek lloji i autonomisë e që thekson se shpreson që të mos jetë autonomia territorial.
“Jo domosdoshmërisht autonomia nënkupton autonomi të fuqishme, të them autonomi e cila pas 10-25 vjet ka të drejtë të votojë të shkëputet nga një territor, në këtë rast nga Kosova. Po them që logjika mbi të cilën është nënshkruar marrëveshja e 2013, pse janë vendos parimet më 2015 dhe pse është nënshkruar tash që e tha zoti Kurti, janë pranuar marrëveshjet e kaluara dhe që zoti Lajçak ka thënë vet dje se vetëmenaxhimi nënkupton Asociacionin, po flasim për autonomi. Për mua është e rëndësishme që gjatë punës në aneks për tu zbatuar kjo që është nënshkruar, me i ik autonomisë territoriale”, ka deklaruar ai.
Bashkimi Evropian e ka quajtur si shumë të suksesshëm takimin e 18 marsit në Ohër, në mes kryeministrit Kurti dhe presidentit serb Vuçiq.
BE-ja ka thënë se të palët janë pajtuar për zbatimin e Marrëveshjes drejt normalizimit të marrëdhënieve mes tyre, të mbështetur nga BE-ja.
