Qeveria e Kosovës sot ka mbajtur mbledhje ku është shqyrtuar Projektligji mbi Ndarjet Buxhetore për Buxhetin e Republikës së Kosovës për vitin 2024.
Ministri i Financave, Hekuran Murati, ka thënë se ky propozimbuxhet ofron më të mirën për qytetarët.
“Ky propozim buxhet ofron më të mirën për qytetarët dhe ekonominë tonë dhe nëpërmjet këtij buxheti synohet vazhdimësia e reformave strukturore gjatë mandatit tonë si qeveri, të cilat do të gjenerojnë rritje të qëndrueshme ekonomike, rritje të mirëqenies së qytetarëve, rritje të punësimit por gjithmonë duke siguruar edhe qëndrueshmëri të financave publike në periudhën afatmesme dhe afatgjatë”, tha ai.
