Deputeti nga radhët e VV-së, Armend Muja ka komentuar marrëveshjen e fundit të rënë dakord ndërmjet Kosovës e Serbisë në Ohër.
Duke tentuar t’ia zbehë rëndësinë, Muja ka thënë se vetëmenaxhimi nuk është as vetëqeverisje, e lëre diçka më shumë.
“Vetëmenaxhimi nuk është as vetëqeverisje e lëre më diçka më shumë. Vetëmenaxhimi do të thoja fokusohet më shumë tek procesi se sa tek etniteti dhe territorialiteti i gjërave siç ka qenë në vitin 2013. Projekti i diskutuar thellësisht që nga viti 2016-2020 e mjerisht i dakorduar edhe brenda vendit tonë merr fund,”– ka thënë Muja.
Ai më tej ka shtuar se për disa elementë të vetëmenaxhimit, Kosova është pajtuar që në vitin 2018 dhe janë elementë që kanë dalë nga Pako e Ahtisarit.
Tutje, Muja ka thënë se elementet territoriale dhe etnike me të cilat është pajtuar ish-kryeministri Isa Mustafa në vitin 2015 nuk janë valide.
“Këto elementet territoriale etnike që Isa Mustafa i ka pranuar në vitin 2015 dhe më pas Gjykata Kushtetuese i ka shpallur të pavlefshme nuk besoj që janë valide,”- është shprehur Muja./PrishtinaPress/
