Shaban Murseli po vazhdon të kujdeset për fëmijët e Liridona Ademajt dhe Naim Murselit, djalit të tij që dyshohet bashkë me dy të tjerë për vrasjen e bashkëshortes së tij 30-vjeçe.
Murseli, sot është deklaruar sërish rreth ngjarjes që tronditi Kosovën javën e kaluar.
Ai tha se nuk ka ende informacione mbi motivin e ngjarjes.
“Ende diçka konkrete nuk jam i informuar. Vetëm spekulime të mediave. Arsyen e vërtetë e dinë vetëm ata dy. Ata nuk kanë pasur probleme financiare si çift. Unë jam i shokuar dhe s’jam i interesuar me mbrojt Naimin”, tha Shaban Murseli në një deklarim për portalin Indeksonline.
Ai ka folur edhe për gjendjen e fëmijëve si dhe për besën që ia ka dhënë familja e të ndjerës Ademaj.
“Fëmijët e Liridonës mbrëmë për herë të parë i kanë kërkuar dajtë e tyre. Ne nuk kemi asnjë kontakt me familjen Ademaj. Besë kemi pas dy ditë, dy ditë kanë kaluar dhe ne nuk kemi më asnjë informatë tjetër”, ka thënë Shaban Murseli.
