Kampionia e Kosovës në futboll në konkurrencë të femrave, Mitrovica, ka debutuar me humbje të thellë në Ligën e Kampionëve.
Mitrovica u mposht thellë 6:1 nga kampionia e Hungarisë, MTK, në turneun e raundit kualifikues të Ligës së Kampionëve, shkruan Koha Ditore.
Ndeshja e parë e Grupit E u zhvillua të martën në Budapest të Hungarisë, ku do të zhvillohet gjithë turneu kualifikues i këtij grupi. Pjesë e Grupit E janë edhe skuadra turke Atashehir Belediyesi dhe ajo e Çekisë, Slavia Praha, që llogaritet si më e forta.
Golin e vetëm për skuadrën e Mitrovicës e shënoi Ambra Gjergji në minutën e 82-të, kurse për skuadrën hungareze shënuan Lilla Nagy (7′), Reka Demeter (44′), Adrienn Olah (48′), Diana Csanyi (51′), Anita Pinczi (76′) dhe Nicole Christina Molen (79′).
