Mirela Gjikokaj po kalon superformë në prag të grumbullimit me skuadrën e Kosovës, ndërsa me skuadrën Follo HK po marshon drejt elitës norvegjeze.
Follo udhëheq në tabelë me 41 pikë, ndërsa dy skuadrat e para në tabelë kalojnë në elitë e hendbollit në Norvegji.
Në ndeshjen e fundit, hendbollistja e Kosovës realizoi plot tetë gola, ndërsa shkëlqimin e vazhdoi me tetë asistime. Ajo u shpall më e mira e ndeshjes së fituar në udhëtim ndaj Fjellhammer me rezultat 32-25.
Disa prej golave të Mirelës ishin shumë të bukur dhe u shënuan nga më larg se nëntë metra.
Për formën e mirë që e ka kaluar këtë edicion, hendbollistja është shpërblyer me kontratë të re trevjeçare nga Follo.
Kontratën e ka firmosur tashmë. Ajo është prej bartëseve të lojës te skuadra norvegjeze e po ashtu edhe te Kosova.
Mirela e ka edhe një ndeshje të shtunën e më pas do të grumbullohet me Përfaqësuesen, me shpresë që formën e mirë ta vazhdojë në dy ndeshjet e forta ndaj Polonisë.