Kreu i Partisë së Lirisë doli nga ambientet e SPAK pasi u mor në pyetje për rreth tre orë nga prokurorët.
Meta nuk dha shpjegime para gazetarëve për çështjen që është pyetur nga Prokuroria e Posaçme, por tha me ironi se u thirr në cilësinë e kundërshtarit të ‘Dum Dumanit’, referuar kryeprokurorit dhe si kundërshtar i narko-regjimit.
Kreu i PL-së nuk i kurseu akuzat ndaj SPAK, duke thënë se në vend të hetojë aferat korruptive, ‘merret me laraskat’,
“Jam pyetur në cilësinë e kundërshtarit të Dum Dumanin që nuk do të hetojë Mc Gonigal. Në vend të ndalojë Edi Ramën, inceneratorët, aferën e Durrësit, PPP që janë rrjedhje financiare, merret me laraskat.
“Po të doni kur të doni ju, tani po iki se kam sipërmarrje kam tryezën. Këtë do Dum Dumani, të mos merremi. Këtë detyrë i ka caktuar Rama, ne do shkojmë te sipërmarrja. U thirra si kundërshtar i narko regjimit”, tha Meta.
Ajo që dihet është Metës i është dërguar ftesë nga prokurori i posaçëm, Sotir Kllapi që po kryen hetim pasuror ndaj çiftit Meta.
“Çfarë ka ndodhur, çfarë ka ndodhur? Po shkoj të takoj Dum Dumanin. A e njihni Dum Dumanin kush është? Është ai që nuk guxon të hapë Çështjen McGonigal. Sepse është kokë e këmbë bashkë me Edi Ramën. Dum Dumani është ai që nuk guxon të përmendë njëherë emrin e Edi Ramës, as për Çështjen e Sali Berishës”, tha Meta para gazetarëve teksa i drejtohej derës së SPAK në orën 10:00.
SPAK i mori deputetes Monika Kryemadhi pesë orë nga dita e saj një ditë më parë. E thirrur si person që ka dijeni, deputetja e Partisë së Lirisë tha sapo doli nga prokuroria se u pyet për të gjitha.
Me një telefon që vazhdon të jetë i sekuestruar por që zonja Kryemadhi shprehet se në të ka “vetëm gjëra të bukura”, ftesa ndaj saj ishte edhe si bashkëshorte e ish presidentit Ilir Meta, për sa kohë në paketën e pyetjeve ishin përfshirë edhe ndërhyrjet estetike edhe lobimi.
Ndryshe nga çdo radhë tjetër kur e ka kaluar këtë prag si denoncuese, si e denoncuar deputetja dha përgjigje edhe për një çështje tjetër. Veç krizës politike mes çiftit Meta, Kryemadhi e bëri të qartë se kishte dhe një lloj tjetër ndarjeje me Ilir Metën dhe kjo është për shkak të qëndrimeve të tij ndaj SPAK.
Për hetimet SPAK gjatë dy viteve ka kryer disa veprime, më kryesoret letërporositë dhe kontrollet financiare. Se cilat janë përgjigjet do të kuptohet në javët në vazhdim, ku dyert e SPAK janë të hapura edhe për persona të tjerë që pritet të thirren./TopChannel