Kapiteni i Argjentinës, Lionel Messi, ka thënë se do ta shkëmbente një titull të Barcelonës për një trofe me ekipin kombëtar të Argjentinës.
Messi ka gëzuar një karrierë të mbushur me trofe të ndryshëm në Barcelonë, megjithatë, pesë herë fituesi i Topit të Artë ende është në kërkim të titullit të parë të rëndësishëm me Argjentinën, transmeton Express.
30-vjeçari e udhëhoqi Argjentinën drejt finales së Botërorit Brazili 2014, por që nuk mjaftoi pasi u mposht nga Gjermania. Po ashtu, Messi përjetoi dy humbje radhazi në finale të Kupës së Amerikës më 2015 dhe 2016.
Pas një sezoni ku triumfoi në La Liga dhe Kupën e Mbretit, të cilat e çuan në 32 numrin e trofeve të fituar nga ai në total në Barçë, Messi dëshiron me patjetër ta shijojë suksesin me Kombëtaren.
“Do ta shkëmbeja një titull të Barcelonës për një trofe me ekipin kombëtar”, ka thënë Messi për televizionin argjentinas El Trece.
“Të fitoja një titull me Argjentinën do të ishte diçka shumë e veçantë”, shtoi ai.
Argjentina e nis fushatën e saj në Kupën e Botës më 16 qershor kundër Islandës.
