Mediat në Beograd jo vetëm që kanë raportuar për atë që Mustafa e ka thënë sot në Podujevë, por kanë komentuar se kjo është “shuplakë” për Thaçin.
“’Shuplaka’ e Mustafës për Thaçin: Nuk ka ushtri pa SHBA-të”, është titulli kryesor në mediat serbe, transmeton lajmi.net.
“Problemin e ushtrisë do ta zgjidhim, por këtë do ta bëjmë në koordinim me Shtetet e Bashkuara të Amerikës dhe NATO-n”, ka thënë kryeministri i Kosovës, Isa Mustafa.
Këtë deklaratë ai e ka bërë në përvjetorin e Lidhjes Demokratike në Podujevë.
“Me Shtetet e Bashkuara të Amerikës e kemi bërë këtë shtet që e kemi dhe me Shtetet e Bashkuara të Amerikës duhet t’i ndërtojmë edhe institucionet e ardhshme të Republikës së Kosovës. SHBA-të e përkrahin themelimin e Ushtrisë së Kosovës, por kërkojnë që ky themelim i Ushtrisë së Kosovës të bëhet në bashkëpunim dhe në bashkërenditje me ta”, ka thënë Mustafa.
