Shpesh jemi mësuar të lexojmë tituj ‘peshkues të klikimeve’ në mediat shqiptare, si për shembull “Ky shtet e bën rrogën minimale 10 mijë euro” apo “Në këtë shtet java ka 6 ditë pushim”.
Por këtë herë janë mediat e huaja që përdorin këtë metodë. Të habitur nga fakti se në vendin tonë është djegur raundi i dytë për president, pa asnjë kandidaturë për postin e kreut të shtetit, mediat e huaja, duke cituar AFP, shkruajnë për ngërçin politik në Shqipëri.
“Askush nuk do? Ky shtet nuk zgjedh dot presidentin e ri se nuk ka kandidatë”, shkruan RT në vesrionin spanjoll. Sot Parlamenti shqiptar dështoi të votonte kandidaturat për president për shkak se nuk ka ende të tilla. Mazhoranca e quan mungesën e kandidaturave si lëvizje për t’i dhënë kohë opozitës të bëhet pjesë e procesit për zgjedhjen e një presidenti gjithëpërfshirës dhe me konsensus. Tashmë kanë mbetur edhe tre raunde, por fati i zgjedhjes së presidentit të ri është ende i paqartë.
