Ministri i Financave, Hekuran Murati, ka deklaruar se Qeveria e Kosovës ka si synim të ulë importin, por theksoi se ky proces do të kërkojë kohë për t’u realizuar, duke pasur parasysh “gjendjen e trashëguar ekonomike”.
Ai ka theksuar se gjatë qeverisjeve të kaluara, shumë fabrika riprodhuese janë shitur për hekur, duke krijuar një pengesë të madhe për zhvillimin e kapaciteteve prodhuese vendore.
Ministri gjithashtu gjatë seancës plenare të kuvendit, ka deklaruar se diçka që është shkatërruar brenda 20 vjetëve, nuk mund të ndreqet për një mandat.
E i ashpër ka qenë reagimi i deputetit të LDK-së, Avdullah Hoti, pas deklaratave të Muratit.
Hoti tha e pyeti “me sa fytyrë” bën deklarata të tilla.
“Me debatu me këtë person është problem, se ky debaton me fanatizëm. Këtij nuk i intereson e vërteta, edhe vazhdon me atë propagandën e poshtër, të ulët. Me sa fytyrë del në foltore, edhe i thu njeriut që është shkatërru Kosova që 20 vjet. Me 13 mijë njerëz të vrarë, e me njerëz pa gjymtyrë, e me shtëpi të shkatërruara. Ti thu është shkatërru Kosova gjatë 20 viteve. Kur i shton këto në Kuvend, nuk ka vend për debat”, tha Hoti.
