Përgjatë javës së parë, që nga liberalizimi i vizave për qytetarët e Kosovës, në Aeroportin e Prishtinës “Adem Jashari”, janë realizuar mbi 83 mijë udhëtime vajtje-ardhje.
Kështu ka bërë të ditur nzëdhënësja e aeroportit, Valentina Gara.
“Rreth 83 mijë e 141 persona kanë udhëtuar, përfshirë këtu vajtje-ardhje, dhe në këto shifra bëjnë pjesë edhe udhëtimet e diasporës”, ka thënë Gara.
Sipas saj, mbi 600 fluturime janë realizuar për shtatë ditë.
“Në total janë 620 fluturime, duke përfshirë 309 në ardhje dhe 311 nisje”, shtoi më tej ajo.
Prej 1 janarit, shtetasit e Kosovës me pasaporta biometrike janë në gjendje të udhëtojnë lirshëm në shtetet e zonës Schengen, pas hyrjes në fuqi të vendimit për liberalizimin e vizave.
Por, vetëm më 5 janar u bë e qartë se ata do të mundë ta vizitojnë edhe Spanjën, pas një njoftimi nga Departamenti për Migrim dhe Çështje të Brendshme i Komisionit Evropian se Spanja njeh tashmë pasaportën e zakonshme kosovare.
Liberalizimi i vizave u mundëson qytetarëve të Kosovës, që kanë pasaporta biometrike, të qëndrojnë deri në 90 ditë – brenda gjashtë muajsh – në cilindo nga 27 shtetet anëtare të zonës Schengen.
Udhëtimet pa viza shërbejnë për vizita turistike, çështje familjare ose të ngjashme. Megjithatë, liberalizimi i vizave nuk nënkupton leje pune apo përfitime të tjera.
