Më shumë se 75.000 ushtarë rusë që luftonin në Ukrainë, besohet se janë vrarë apo plagosur, ka thënë ligjvënësja amerikane, Elissa Slotkin.
Kjo shifër përbën gati gjysmën e numrit të trupave që Moska i ka dërguar në Ukrainë, prej nisjes së pushtimit të këtij shteti më 24 shkurt.
Duke folur për transmetuesin amerikan, CNN, Stolkin ka thënë se shifra e viktimave është “shumë e madhe”.
Ajo i ka bërë këto deklarata pas pjesëmarrjes në një takim me zyrtarë për inteligjencë të administratës së presidentit amerikan, Joe Biden.
“Ne jemi njoftuar se mbi 75.000 rusë, ose janë vrarë, ose janë plagosur, e që është shifër e madhe. Shuma të mëdha janë investuar në forcat e tyre tokësore, mbi 80 për qind e këtyre forcave janë të bllokuara ose të lodhura”, ka thënë ajo.
Viktimat ushtarake konsiderohen sekrete shtetërore në Rusi – edhe në kohë të paqes – prandaj Moska nuk i përditëson të dhënat e saj.
Sipas vlerësimeve të fundit të Agjencisë Qendrore të Inteligjencës (CIA), rreth 15.000 ushtarë rusë janë vrarë në luftime, raporton rel.
Slotkin, e cila ka vizituar së fundi Ukrainën, ka thënë se periudha e ardhshme – tri deri në gjashtë javë – do të jetë shumë e rëndësishme për drejtimin që do të marrë lufta.
“Mendoj se e kemi dëgjuar presidentin (ukrainas, Volodymyr) Zelensky se ukrainasit duan të godasin fort Rusinë para stinës së dimrit”, ka thënë ajo.
Nëse konfirmohen, këto shifra do të përbënin humbje të mëdha për Rusinë, teksa Ukraina çon përpara kundërofensivën në pjesët jugore të pushtuara nga Rusia, me qëllim të marrjes së kontrollit të qytetit Herson.
Ky qytet, i cili ka pasur popullsi prej 290.000 banorësh para luftës, aktualisht është nën një administratë të emëruar nga Moska.
Hersoni ka qenë një prej qyteteve të para që ka rënë në duart e forcave ruse, pas nisjes së luftës.
Ministria britanike e Mbrojtjes ka thënë në përditësimin e saj të fundit se kundërofensiva ukrainase në Herson po fiton momentumin.
Rikthimi i kontrollit të qytetit do t’iu krijonte ukrainasve një terren për të marrë edhe disa pjesë tjera në brigjet e Detit të Zi.
Inteligjenca britanike ka konfirmuar se ura Antonivskiy afër Hersonit, e cila është dëmtuar javën e kaluar, është goditur sërish më 27 korrik, “dhe tani mund të mos jetë stabile për kalim”.
Antonivskiy është një prej tri urave rreth Lumit Dniepër që është dëmtuar nga forcat ukrainase, me ndihmën e artilerisë me rreze të gjatë.
Rusia varet nga këto ura për të furnizuar zonat që ka nën kontroll.
Inteligjenca britanike ka thënë se Hersoni, qendra më e rëndësishme politike që është pushtuar nga Rusia tani është “shkëputur” nga territoret tjera që janë pushtuar nga rusët.
Humbja e Hersonit do të dëmtonte përpjekjet e Rusisë për të shpërfaqur pushtimin si sukses, ka thënë inteligjenca britanike.
Një zyrtar ukrainas i mbrojtjes ka thënë se trupat ruse janë duke u rishpërndarë në jug të shtetit, përfshirë zonën e kundërofensivës ukrainase.
Sekretari i Këshillit ukrainas të Sigurisë, Oleksiy Danilov, i ka bërë këto komente në televizionin ukrainas më 27 korrik, duke thënë se ripozicionimi është duke u bërë në drejtim të Hersonit, Melitopolit dhe Zaporizhjas.
Danilov ka thënë se Ukraina është duke pranuar shumë armë nga partnerët ndërkombëtarë.
“Tani jemi duke pranuar sasi të madhe të ndihmës”, ka shtuar ai.
Në mesin e armëve që kanë pranuar ukrainasit janë edhe sistemet raketore HIMARS të Shteteve të Bashkuara.
HIMARS kanë rreze të gjatë veprimi dhe janë më precize sesa artileria e periudhës sovjetike që Ukraina e ka pasur në arsenalin e saj.
Presidenti rus, Vladimir Putin, ka urdhëruar pushtimin e Ukrainës më 24 shkurt.
Ai e quan luftën si “operacion special ushtarak” për të çmilitarizuar Ukrainën.
Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.
