Nga viti 2010 deri në nëntorin e vitit 2023, në Kosovë janë vrarë 52 gra. Organizatat për mbrojtjen e të drejtave të njeriut, në disa raste, kanë fajësuar autoritetet për dështim në mbrojtjen e grave të rrezikuara nga dhuna.
Në të shumtën e rasteve, autorë të vrasjeve kanë qenë bashkëshortët, pastaj baballarët dhe djemtë.
Infografika: REL
Ndryshe, rasti i fundit i vrasjes së Liridona Murselit ka tronditur vendin. Ajo vdiq tragjikisht, pasi bashkëshorti i saj, Naimi, dyshohet se ofroi pagesë për vrasjen e saj, që fillimisht e inskenoi si grabitje.
Gjykata Themelore në Prishtinë ia ka caktuar Naim Murseli masën e paraburgimit prej 1 muaji e po ashtu edhe dy të dyshuarve të tjerë.
Murseli është i dyshuar për organizim të vrasjes, Granit Plava është i dyshuar për kryerje të vrasjes dhe Kushtrim Kokalla, pjesëtar i Forcës së Sigurisë së Kosovës, është i dyshuar për shkak të veprës penale, marrëveshja për të kryer veprën penale, vrasje e rëndë.
Kujtojmë se familja Ademaj e ka zhvarrosur sot trupin e të ndjerës prej ku është varrosur më 1 dhjetor, dhe do të rivarroset në varrezat e fshatit Rracaj në Gjakovë.
