Policia franceze ka arrestuar 217 persona të enjten mbrëma gjatë incidenteve që pasuan një demonstratë në Paris, si pjesë e protestave masive të vazhdueshme kundër reformës së pensioneve , e cila përfundimisht u vendos të zbatohej pa votim në dhomën e ulët.
Sipas France Info, 217 persona janë arrestuar në incidentet që shpërthyen në Place de la Concorde, në qendër të kryeqytetit francez. Sipas të njëjtit burim, njësitë e policisë përdorën gaz lotsjellës kundër protestuesve.
Kur shpërthyen incidentet, sipas vlerësimeve të mediave franceze, në shesh ishin rreth 6000 njerëz. Pasditen e së enjtes, qeveria vendosi në minutën e fundit të zbatojë projektligjin e pensioneve, i cili do të rriste moshën e pensionit nga 62 në 64 vjeç, duke anashkaluar dhomën e ulët, pasi ishte e paqartë nëse ekzistonte shumica e nevojshme.
Ekziston një nen i Kushtetutës Franceze që lejon të ndiqet kjo rrugë. Por reforma mund të anulohet në rast të votimit të mosbesimit ndaj qeverisë së presidentit Emmanuel Macron dhe kryeministres Elisabeth Bourne.
Demonstrata u organizuan dje në shumë qytete të tjera franceze (Marsejë, Dijon, Nante, Ren, Ruen, Grenoble, Tuluzë, Nice). Sindikatat po bëjnë thirrje për një grevë të re kombëtare të enjten e ardhshme dhe mobilizime masive nga fundjava. Miliona francezë kanë protestuar vazhdimisht në rrugë kundër reformës.
