MASHT ka bërë një njoftim në faqen zyrtare ku ka treguar se është hapur dritarja e aplikimit për subvencionimin e teksteve shkollore dhe materialeve mësimore në E-kosova.
Ministria e Arsimit ka treguar se aplikimi do të jetë i hapur deri në fundin e muajit shtator dhe se mjetet do të dalin në xhirllogarinë e prindërve nga java e ardhshme.
Por MASH s’ka përmendur fare problemet teknike që janë shfaqur qysh ditën e parë të hapjes së aplikimit në E-kosova, ndërkohë kanë treguar se në dispozicion është një numër telefoni dhe një email, për pyetjet që prindërit mund t’i kenë.
Njoftimi i plotë:
Të nderuar prindër,
Ministria e Arsimit, Shkencës, Teknologjisë dhe Inovacionit ka hapur platformën për aplikim për subvencionimin e teksteve shkollore dhe materialeve mësimore. Mjetet do të dalin në xhirollogaritë tuaja që nga java e ardhshme.
Aplikimin për subvencionimin e teksteve shkollore dhe materialeve mësimore mund ta bëni në Platformën E-Kosova deri në fund të muajit shtator.
Linku për aplikim: https://ekosova.rks-gov.net/Service/5
Në shërbimin tuaj janë edhe numrat e telefonit pa pagesë për çfarëdo pyetje që mund të keni rreth mënyrës së aplikimit: 0800 30 900 si dhe emaili: libri@rks-gov.net
MASHTI këtë vit shkollor do të sigurojë tekstet e reja për nxënësit e klasave 1-5, ndërsa për nxënësit e klasave 6-9 do të jenë në dispozicion tekstet e vitit paraprak. Për klasat 6-9, tekstet tashmë ndodhen në shkolla, dhe do t’u ndahen nxënësve sapo të fillojë mësimi.
Për secilin nga nxënësit filloristë (klasa 1-5), në total do të ndahen nga 80 euro, 50 euro për tekstet shkollore dhe 30 euro për mjetet mësimore. Ndërsa për nxënësit e arsimit në nivelin e mesëm të ulët (klasat 6-9) të cilët i kanë librat të siguruar nga viti paraprak, do të ndahen nga 30 euro për mjetet mësimore.
MASHTI do ta përcjell procesin e aplikimit me shumë vëmendje dhe do ta adresojë secilën sfidë që paraqitet, si në aspekt teknik e poashtu edhe përmbajtësor.
Në bashkëpunim me DKA-të dhe shkollat, do të sigurohemi që të gjithë fëmijët të jenë të pajisur me tekste shkollore.
Suksese!