Zëvendëskryeministri i Parë dhe Ministri i Punëve të Jashtme, z. Behgjet Pacolli, ka zhvilluar sot një takim të jashtëzakonshëm me delegacionin e MPB-së në përbërje të ministrit të Punëve të Brendshme, z. Bejtush Gashi, drejtorit e Trafikut në Policinë e Republikës së Kosovës, z. Samedin Mehmeti dhe znj. Drita Perezic, këshilltare e Lartë në ICITAP në Ministrinë e Punëve të Brendshme, me qëllim të adresimit të gjendjes alarmante në sigurinë e trafikut rrugor, e cila po rezulton me humbjen e jetërave të qytetarëve të Republikë së Kosovës.
Gjatë këtij takimi, z. Pacolli kërkoi nga institucionet përgjegjëse, si nga Ministria e Punëve të Brendshme dhe Policia e Republikës së Kosovës, identifikimin, ndërmarrjen dhe fuqizimin e masave emergjente, për rritjen e sigurisë në trafikun rrugor dhe parandalimin e fataliteteve.
Për këtë qëllim Zëvendëskryeministri i Parë, z. Pacolli kërkoi specifikisht nxjerrjen e një vendimi nga Ministria e Punëve të Brendshme për ndërmarrjen e masave emergjente si në vijim:
- Sigurimin nga policia dhe institucionet tjera kompetente të vendpunishteve, të cilat nuk kanë të vendosura shënjezimin adekuat dhe që rrezikojnë trafikun publik;
- Identifikimin e masave administrative nga Ministria e Punëve të Brendshme, në funksion të konfiskimit të dokumenteve të udhëtimit sikurse letërnjoftimi, patentshoferi dhe pasaporta, për të gjithë ata të cilët rrezikojnë trafikun publik;
- Informimi përmes rrugëve diplomatike i shteteve përkatëse për shtetasit e Republikës së Kosovës që jetojnë në diasporë, për shkeljet e rregullave të komunikacionit, dhe në këtë kontekst, zbatimin efikas të marrëveshjeve bilaterale me këto vende;
- Bashkëpunimin me media dhe komunitet në funksion të ngritjes së vetëdijes publike;
- Varësisht nga niveli në shkelësit e ligjit në trafik, edhe mbështetjen në normat penale, përfshirë edhe arrestimin e shkelësve flagrant.
Në lidhje me masat e lartcekura, Zëvendëskryeministri i Parë dhe Ministri i Punëve të Jashtme, z. Pacolli kërkoi nga ministri i Punëve të Brendshme dhe Policia e Kosovës, që ta mbajnë të informuar në vazhdimësi përkitazi me aplikimin e masave të kërkuara.
Lidhur me përgatitjen e vendimit dhe masave specifike, do të informoheni gjatë ditës edhe nga Ministria e Punëve të Brendshme dhe Policia e Kosovës.
