Bashkimi Evropian nuk ka komentuar të dielën rreth raportimeve se Kosovës e Serbisë u është prezantuar një kornizë e re e bisedimeve. Peter Stano, zëdhënësi i BE-së për Çështje të Politikës së Jashtme dhe Sigurisë ka thënë se nuk komentojnë rreth kësaj çështjeje.
“Si rregull i përgjithshëm dhe si çështje e parimit, ne nuk komentojmë dokumentet e pretenduara të raportuara nga mediat, as sa i përket autenticitetit e as përmbajtjes”, ka thënë Stano për Koha’n.
Albanian Post ka publikuar një dokument ku thuhet se emisarët europianë tashmë kanë prezantuar një dokument në Prishtinë e Beograd me të cilin palëve u kërkohet që të arrijnë një marrëveshje për normalizimin e marrëdhënieve në vitin e ardhshëm. Njohja nuk do të përfshihej në këtë marrëveshje, ajo do të trajtohej kur të vijë koha e anëtarësimit në BE.
Kosova dhe Serbia dialogojnë më shumë se 10 vjet. Por pak progres ka pasur në normalizimin e marrëdhënieve.
Shumë marrëveshje të Brukselit nuk janë respektuar nga Beogradi./Prishtinapress/