Në kuadër të takimeve me homologët e vendeve partnere, ministri i Mbrojtjes, Ejup Maqedonci, sot ka pritur në vizitë ministrin e Mbrojtjes të Kroacisë, Ivan Anushiq, së bashku me delegacionin e tij.
Sipas një njoftimi, takimi u zhvillua në frymën e miqësisë së thellë që ekziston mes dy vendeve në përgjithësi, dhe marrëdhëniet e shkëlqyeshme dypalëshe në fushën e mbrojtjes dhe sigurisë në veçanti, transmeton Klankosova.tv.
Ministria e Mbrojtjes bën të ditur se Maqedonci informoi homologun e tij kroat për gjendjen e përgjithshme të sigurisë në vend, me theks të veçantë në pjesën veriore të vendit, pas sulmit terrorist në kanalin e ujit në fshatin Varagë, të komunës së Zubin Potokut.
“Gjatë këtij takimi, po ashtu u diskutuan një sërë çështjesh të rëndësishme për të dy vendet, përfshirë edukimin dhe trajnimin e personelit ushtarak, zhvillimin e kapaciteteve mbrojtëse dhe bashkëpunimin në projekte të përbashkëta. Republika e Kroacisë është ndër partnerët strategjikë të Kosovës, ndërsa marrëdhëniet e shkëlqyeshme ndërmjet dy vendeve kanë bazamentin në histori, vlera dhe një të ardhme të përbashkët”, thuhet në njoftim.
