Zëdhënësi i Lëvizjes Vetëvendosje, Arlind Manxhuka ka reaguar ndaj qëndrimeve të LDK-së dhe PDK-së karshi veprimeve të kryeministrit të Kosovës, Albin Kurti në procesin e dialogut me Serbinë dhe për marrëveshjen potenciale me Serbinë që pritet të nënshkruhet më 18 mars në Ohër.
Sipas Manxuhkës, opozita duke tentuar të amnistojë veten e merr mbi shpinë edhe një faj shtesë.
Zëdhënësi i VV-së thotë se ata që i kanë krijuar borxhe Kosovës po bëjnë përpjekje ta amnistojnë veten me shpresën që Kurti ua përmirëson gabimet.
Manxhuka ka shkruar se e vetmja sfidë që sot ka Kosova është trashëgimia në procesin e dialogut dhe sipas tij partitë opozitare që duan ta nxjerrin Kurtin keq në këtë momentum, e konfirmojnë se ai ka pasur drejt në të qëmdrimet e tij në të kaluarën.
Reagimi i plotë:
Opozita dhe mbështetës të saj nëpër paraqitje mediatike më shumë se për Kosovën kanë hallin e amnistimit të vetes. Këtë e bëjnë në mënyrë të fshehtë duke kritikuar Kurtin se po nënshkruan ato që i ka kundërshtuar.
Në këtë logjikë të tentim-amnistimit të vetes shkaktohet gjithashtu edhe një faj shtesë, këta opozitarë të sotëm me mbështetësit e tyre përreth duke folur për kinse kundërthëniet e Kurtit harrojnë një gjë esenciale, që krahas thirrjeve me kohë të VV-së dhe Kurtit, pra për gjërat që tash janë trashëgimi e Kosovës nga dialogu, është vepruar sakëtisht në drejtim të kundërt me ato thirrjet tona, duke nënshkruar kështu lëshime të mëdha për Kosovën.
Pra, ata që i krijuan borxhe Kosovës duan të amnistojnë veten duke shpresuar që Kurti ua përmirëson gabimet. Në fakt, sot në dialog me Serbinë e vetmja sfidë për Kosovën është pikërisht e kaluara e saj, trashëgimia në dialog.
Në të vërtetë, këta që po duan të nxjerrin VV-në në kundërthënie në fakt veçse po e konfirmojnë që ajo ka pasur të drejtë atëherë. Nëse dikur VV e kishte të saktë ekuacionin, sot e ka edhe provën.
