Artan Dërmaku është zgjedhur sot rektor i Universitetit Publik të Gjilanit “Kadri Zeka”. Në krye të këtij universiteti Dërmaku do të qëndrojë katër vite.
Pas emërimit të tij në krye të Universitetit të Gjilanit ka reaguar anëtarja e LDK-së, Jehona Sadriu-Lushaku.
Ajo tha se Dërmaku është anëtar i partisë në pushtet, pra Lëvizjes Vetëvendosje.
“Anëtari i VV-së, rektor i Univeristetit të Gjilanit! Thonin që do t‘a bëjnë ‘çkapjen’… ‘Çkapje’ duke zgjedhur anëtarin e VV-së rektor të Universitetit të Gjilanit?! Rektor partiak?! ‘Ndryshimi’ i kërkuar po merr formë: Kapje e të gjitha institucioneve publike nga partia në pushtet”, ka shkruar Sadriu në një postim në “Facebook”.
Dërmaku është edhe bashkëshorti i Komisionerës së Agjencisë për Informim dhe Privatësi, Krenare Sogujeva.
Këshilli Drejtues i Universitetit Publik “Kadri Zeka” në Gjilan, në mbledhjen e mbajtur të enjten, me votim të fshehtë ka zgjedhur Artan Dërmakun rektor të universitetit për mandatin katërvjeçar.
Në këtë mbledhje është bërë intervistimi i kandidatëve që kanë aplikuar për pozitën e rektorit, me ç’rast kandidatët kanë pasur mundësinë të shpalosin vizionin e tyre, objektivat dhe prioritetet, për periudhën 2023-2027 për zhvillimin e Universitetit.
“Sipas statutit të Universitetit të Gjilanit ‘Kadri Zeka’ dhe rregullores së Këshillit Drejtues të UKZ-së, rektorin e zgjedh Këshilli Drejtues nga lista e kandidatëve të propozuar nga komisioni profesional, i zgjedhur nga Senati i Universitetit. Rektori është zgjedhur duke marrë shumicën e votave të anëtarëve të përgjithshëm në pajtim me dispozitat e këtij statuti”, thuhet në komunikatë.
Ndryshe, me zgjedhjen e rektorit është përmbyllur gjithë procesi zgjedhor në UKZ. Fillimisht studentët kanë zgjedhur përfaqësuesit e tyre, janë mbajtur zgjedhjet për këshillat e fakulteteve dhe së fundi është konstituuar edhe përbërja e re e senatit, të cilët do të marrin mandatin më 1 tetor 2023
