Komiteti i Marrëdhënieve Ndërkombëtare dhe Mbrojtjes së Dhomës së Lordëve në Britani të Madhe i ka dërguar një letër Sekretarit të Jashtëm, Lordit David Cameron, pas përfundimit të hetimit të tij të shkurtër për Ballkanin Perëndimor.
Anëtarët e këtij Komiteti kanë kërkuar që të sigurohen fonde për krijimin e Shërbimit Shqiptar të BBC-së, ekuivalent me dispozitën serbe të BBC-së, “që do të ndihmonte për të luftuar përhapjen e dezinformatave në rajon”.
Në letër është kërkuar që të përdoren instrumente financimi afatgjata për programet e zhvillimit në rajon.
Kjo, sipas Komitetit, do të ndihmonte në sigurimin e parashikueshmërisë për ata që ofrojnë programe dhe do t’i ndihmonte ata të planifikonin për një afat më të gjatë.
Në shkurt të vitit 2011, BBC në shqip e kishte ndaluar transmetimin e saj për dëgjuesit në Shqipëri, Kosovë, Maqedoni.
BBC transmetimin në gjuhën shqipe e kishte nisur në shkurt 1993.
