Ministri i Infrastrukturës, Pal Lekaj tha se për tre muaj kanë ndërmarrë hapa konkret në drejtim të rritjes së sigurisë në komunikacion.
Lekaj në një postim në rrjetin social Facebook shkruan se kanë përfunduar të gjitha procedurat për të miratuar Udhëzimin Administrativ për themelimin e Këshillit për Siguri në Trafikun Rrugor, i cili udhëzim do të miratohet nga Qeveria e Kosovës dhe po ashtu janë dorëzuar pesë projektligje.
Lexoni të plotë postimin e Lekajt në Facebook:
“Pas tre muajsh nga nënshkrimi i deklaratës së përbashkët mes Ministrisë së Infrastrukturës, Ministrisë së Punëve të Brendshme dhe Policisë së Kosovës, përmes së cilës jemi zotuar të punojmë për të ngritur standardet e sigurisë në komunikacionin rrugor.
Si Ministri e Infrastrukturës gjatë këtyre tre muajve kemi ndërmarrë hapa konkret në drejtim të rritjes së sigurisë në komunikacion, kanë përfunduar të gjitha procedurat për të miratuar Udhëzimin Administrativ për themelimin e Këshillit për Siguri në Trafikun Rrugor, i cili udhëzim do të miratohet nga Qeveria e Kosovës, po ashtu janë dorëzuar pesë projektligje, për plotësimndryshim të neneve, të cilat kanë të bëjnë me harmonizimin me ligjin mbi kundërvajtjet në trafik dhe sot, si pjesë e këtyre aktiviteteve, nënshkruam dy memorandume bashkëpunimi, një me Asociacionin Kosovar të Motorizimit dhe një me ndërmarrjen Infrakos.
Me këta faktorë dhe të tjerë, bashkërisht synojmë që të mobilizohemi për të arritur objektivin tonë kryesor, e që është “viti 2018 – vit i sigurisë në trafikun rrugor” dhe që të arrijmë uljen e aksidenteve dhe humbjen e jetëve të njerëzve.
Me këtë dëshirojmë të sigurojmë të gjithë, se do të jemi bashkë në punë, për qytetarët dhe sigurinë e tyre”.
