Deputetja e LDK-së, Hykmete Bajrami ka thënë se Qeveria Kurti ka mashtruar qytetarët.
Ajo në seancën e Kuvendit të Kosovës, ka thënë se kjo qeveri është duke bërë pesëfishin e secilit veprim që ka kritikuar sa ishte në opozitë.
“Më 14 shkurt 2021 LVV fitoi 51% të votave se pas 15 vite në opozitë arriti t’i bind qytetarët se kur të vijnë në qeveri do të bëjnë mrekulli se do t’i ulin çmimet bazë të produkteve, energjia eklektike do të jetë më e lirë, mërgata do të kthehet të punojë në Kosovë e mbi të gjitha do të luftohet nepotizmi. Të gjithëve na kujtohet video e famshme e kryeministrit të tanishëm në fushatën e fundit ku thoshte kushërinjtë janë për dasma nuk ka me shku në ministri me krejt kushërinjtë. Qytetarët verbërisht i kanë besuar Kurtit dhe LVV duke mëndu se njëmend që meritokracia do të vijë në vend dhe qytetarët e kualifikuar pa lidhje partiake e familjare do të mund të punësohen në konkurse të hapura”, ka thënë Bajrami.
Ajo ka shtuar se ajo çfarë ka ndodhur me konkursin në KEK është vazhdimësi e kapjes së institucioneve.
“Jam këtu që në emër të LDK-së t’ju them se LVV-ja ju ka mashtruar dhe po bënë pesëfishin e secilit veprim që e ka kritikuar për 15 vite sa ishte në opozitë. Ajo çka ndodhi në konkursin e KEK-ut është vazhdimësi e kapjes së institucioneve që nga ditët e para të qeverisjes së Lëvizjes Vetëvendosje. Ne dje kemi dorëzuar kallëzim penal dhe shpresojmë që organet e rendit do të reagojnë dhe konkursi do të kthehet në pikën zero”, u shpreh Bajrami.
Deputetja paralajmëroi se në ditët e ardhshme LDK do të shpalosë punësime të tjera militanteske dhe partiake të LVV-së nëpër institucione.