Shtatë vjet më parë, Kosova ishte bërë anëtarja më e re e Federatës Evropiane të Futbollit, duke e mposhtur më në fund kundërshtimin dhe lobimin e ashpër serb.
Në Kongresin e UEFA-s, të mbajtur më 3 maj të vitit 2016, Kosova u bë anëtarja e 55-të e shtëpisë evropiane të futbollit, me 28 vota pro, 24 kundër, ndërsa 2 vota ishin shpallur të pavlefshme.
Pranimi në UEFA i hapi rrugë aplikimit për anëtarësim dhe përfundimisht edhe pranim të FFK-së në FIFA, i cili erdhi vetëm 10 ditë më vonë, më 13 maj 2016.
Kjo pa dyshim se ishte një arritje historike për futbollin kosovar, me legjendën Fadil Vokrri në krye.
Presidenti i atëhershëm i FFK-së kishte bërë punë të madhe dhe të vazhdueshme për ta arritur qëllimin.
Mes lotëve, futbollisti më i madh që e ka pasur ndonjëherë Kosova, para anëtarëve të tjerë të UEFA-s, e kishte bërë një fjalim emocionues pasi i ishte dhënë fjala pak momente pas pranimit në shtëpinë më të madhe të futbollit evropian.
“Jam shumë i emocionuar t’iu drejtohem pasi sot Kosova është pranuar në UEFA. Ky është një moment historik për futbollin kosovar. Një lajm i jashtëzakonshëm për futbollistët, për sportdashësit. Betohemi se do t’i mbrojmë vlerat e futbollit. Faleminderit për votat që na bënë anëtaren e 55-të të UEFA-s. Një drejtësi e vonuar, por një e arritur e jashtëzakonshme”, ishte shprehur Vokrri në selinë e UEFA-s në vitin 2016.
Fatkeqësisht, Fadil Vokrri vdiq dy vjet më pas, pas një sulmi në zemër, më 9 qershor 2018.
