Policia e Kosovës ka arrestuar të martën një zyrtar të Administratës Tatimore të Kosovës (ATK), nën dyshimet për keqpërdorim të detyrës zyrtare.
Policia në njoftim bën të ditur se i dyshuari me dashje dhe dijeninë e tij, ka vepruar në mënyrë të kundërligjshme duke e keqpërdorur detyrën zyrtare, raporton Gazeta Insajderi.
“I dyshuari M. K., viti i lindjes 1969, mashkull/kosovar, kishte lëshuar dokument të rrejshëm në emër të ATK-së, me qëllim që një biznesi të caktuar t’i lirohen pronat e bllokuara”, thuhet në njoftimin e PK-së.
“I dyshuari është intervistuar në prezencën e avokatit mbrojtës dhe me vendim të prokurorit nga PTH- Prishtinë i dyshuari dërgohet në mbajtje për 48 orë”.
Gazeta Insajderi nëpërmjet burimeve merr vesh se i arrestuari është Malush Kelmendi.
Sipas këtyre burimeve, i dyshuari është pjesë e një ekipi në ATK, të cilët nuk janë të kufizuar vetëm në një regjion. Respektivisht, në përshkrimin e punës, Kelmendit dhe pjesës tjetër të ekipit në përshkrimin e punës nuk kanë ndonjë regjion të caktuar operimi.