Kryeministri i Republikës së Kosovës, Albin Kurti, ka takuar kryeshefin ekzekutiv të Partneritetit për Qeveri të Hapur [OGP], Sanjay Pradhan, në kuadër të Samitit që po mbahet në Talin.
Përmes një postimi në rrjetin social Facebook, Kurti ka thënë se gjatë takimit me Pradhan kanë folur për anëtarësimin e Kosovës dhe rolin e saj si anëtare e re.
“Takimin e radhës në Tallinn të Estonisë, e zhvillova me Kryeshefin ekzekutiv të Partneritetit për Qeveri të Hapur (OGP), Sanjay Pradhan. Bashkë folëm për anëtarësimin tonë në muajin gusht, përfitimet e qytetarëve nga ky anëtarësim, përgjegjësitë dhe rolin e Kosovës si anëtare e re”, shkroi ai.
Kujtojmë se Partneriteti për Qeverisje të Hapur është një iniciativë shumëpalëshe që synon të sigurojë angazhime konkrete nga qeveritë kombëtare dhe nën-kombëtare për të promovuar qeverisjen e hapur, për të fuqizuar qytetarët, për të luftuar korrupsionin dhe për të shfrytëzuar teknologjitë e reja për të forcuar qeverisjen.
Në frymën e bashkëpunimit me shumë palë, OGP mbikëqyret nga një komitet drejtues që përfshin përfaqësues të qeverive dhe organizatave të shoqërisë civile.
