Në ditën e dytë të Konventës Kombëtare Demokratike, në margjina të saj, kryeministri Albin Kurti ka treguar se ka takuar senatorët amerikanë, Chris Murphy dhe Peter Welch.
Sipas njoftimit të publikuar në Facebook nga Kurti, thuhet se kreu i ekzekutivit në takim me ta ka shprehur interesin dhe gatishmërinë e plotë “që bashkarisht të punojmë në thellimin edhe më tej të marrëdhënieve me aleatin e partnerin tonë kryesor Shtetet e Bashkuara të Amerikës, e atë në shkëmbimin tregtar, ekonomik, por edhe më gjerë”.
“Biseduam dhe për zgjedhjet historike presidenciale në ShBA të cilat do të mbahen më 5 nëntor dhe gjallërinë e vlerat e rrënjosura të demokracisë së fuqishme amerikane, mbi zhvillimet në vend e rajon, si dhe për rëndësinë e zbatimit në plotni të Marrëveshjes Bazike dhe Aneksit të Ohrit, dhe pranimit e nënshkrimit të saj nga ana e Serbisë, e cila po e refuzon dhe shkel në vazhdimësi marrëveshjen”, ka thënë Kurti ndër të tjera.
Duke kujtuar vrasjen e policit Afrim Bunjaku më 24 shtator të vitit të kaluar në Banjskë, Kurti tha se “ka ardhur koha e fundit që përgjegjësit të dalin para drejtësisë dhe kryekrimineli Millan Radoiçiq t’i dorëzohet autoriteteve të Kosovës dhe për këtë kërkova që ShBA-ja të bëjë trysni mbi Beogradin zyrtar”.
Ndërkohë, para pjesëmarrjes në diskutimin e organizuar nga NDI me titull “Konventa Kombëtare Demokratike dhe Roli i Partive Politike”, Kurti tregoi se ka bashkëbiseduar dhe me Kryetarin e Komitetit Kombëtar Demokrat, Jaime Harrison, në prani dhe të presidentes së NDI, Tamara Wittes dhe kryetarit të Bordit Drejtues të NDI, Tom Daschle.
“Në panel ishim bashkë me ish-Sekretarin e Përgjithshëm të NATO-s, Lord George Robertson dhe Ministrin e Jashtëm të Danimarkës, Lars Lokke Rasmussen”, u shpreh kryeministri Albin Kurti, i cili në Konventën Kombëtare Demokratike mori pjesë si kryetar i Lëvizjes Vetëvendosje.
