Kryeministri i Kosovës Albin Kurti ka akuzuar Serbinë për shkelje të Marrëveshjes dhe aneksit të Ohrit.
Kurti ka thënë se Serbia po shkel veçanërisht nein 4, duke bërë fushatë agresive kundër pranimit të Kosovës në organizatat ndërkombëtare. Por, kryeministri thotë se problemi këtu është se BE-ja nuk do të ndërhyjë edhe nëse Serbia shkel marrëveshjen, shkruan gazeta online Reporteri.net.
“Pala serbe po e shkel marrëveshjen çdo javë, veçanërisht nenin 4: po fillon një fushatë agresive kundër pranimit të Kosovës në organizatat ndërkombëtare. Më tej, presidenti Vuçiq nuk e ka nënshkruar marrëveshjen: ka deklaruar se nuk e ka pranuar në përmbajtje, por vetëm në koncept. Problemi i madh është se BE-ja nuk do të ndërhyjë nëse Serbia shkel marrëveshjen”, është shprehur Kurti në një intervistë për gazetën gjermane Stern.
Kurti ka folur edhe për sulmin terrorist të 24 shtatorit, duke thënë se u bë me urdhër direkt të Beogradit, dhe për këtë kanë fakte.
“Po. Të gjitha problemet tona me sigurinë kombëtare, sovranitetin kombëtar dhe integritetin territorial e kanë origjinën aty. Popullsia jonë përbëhet nga 93% shqiptarë, por edhe 4% serbë dhe minoritete të tjera. Kemi diskriminim aktiv: 20 nga 120 vendet në parlament janë të rezervuara për pakicat e caktuara, por serbët po i bojkotojnë vendet e tyre sepse kështu u tha Beogradi. Ne i mbështesim serbët në Kosovë në mënyra të ndryshme: ndërtojmë shtëpi, ndihmojmë fermerët fillestarë – për këto gjëra kujdeset ministri im për Komunitete dhe Kthim, Nenad Rashiq, serb. Por sa më shumë që bëjmë për serbët në Kosovë, aq më nervoz dhe agresiv bëhet Beogradi. Gjërat janë bërë gjithnjë e më të tensionuara në Beograd vitet e fundit, me mbështetjen për partinë e presidentit Vuçiq që ka rënë në tetë për qind. Në të njëjtën kohë, nën qeverinë time ne kemi ndërmarrë veprime shumë të suksesshme kundër krimit të organizuar. Kjo i bën disa njerëz në veri të Kosovës shumë nervoz sepse ata po e shfrytëzojnë zonën për përfitimin e tyre. Kulmi ishte sulmi terrorist në Kosovë më 24 shtator nga elementë paraushtarakë të trajnuar nga Beogradi dhe që vepronin në emër të tij. Ata vijnë për të nxitur konflikte të reja. Beogradi nuk mund ta durojë suksesin e vendit tonë”, u shpreh Kurti ndër të tjera.
Duke folur për zgjedhjet e nesërme parlamentare në Serbi, Kurti ka thënë se është e qartë se nuk do të ndryshojë asgjë dhe presidenti serb Vuçiq do të vendosë për gjithçka.
“Këto janë vetëm zgjedhje parlamentare dhe në Serbi presidenti vendos gjithçka. Mendoj se Serbia ka marrë një vendim gjeopolitik: nuk do të shkëputet nga Rusia. Ata ishin aq agresivë ndaj Kosovës sepse donin t’u vërtetonin rusëve se ishin agjentë besnikë. Mendoj se nëse BE-ja dhe SHBA-ja e përdorin vërtet shkopin kundër Beogradit, do të ketë efekt. Për shembull, nëse ata rivendosin kërkesën për vizë ose ngrijnë ndihmën financiare sepse Serbia po vepron si një agjent i Rusisë, kjo do të çojë në ndryshime”, është shprehur kryeministri Kurti. /Reporteri.net/
