Kryeministri në detyrë i qeverisë së Kosovës, Ablin Kurti, në një konferencë për media i komentoi zhvillimet e sotshme në vend duke thënë se veprimet e sotme nga presidenti i vendit, Hashim Thaçi, dhe partive të tjera, do t’i adresojë në Gjykatën Kushtetuese.
“Presidenti sot doli në ilegalitet. Formalizimi i deklarimeve të sotme do të përfundojë në Gjykatën Kushtetuese. Presidentit këtë mundësi ia dhanë krerët e LDK-së, të cilët paraprakisht me vullnet braktisën çdo fjalë të thënë e dhënë ndaj qytetarëve e ndaj nesh. Me këso veprime e taktikash shpaloset përpjekja për të blerë ilegalisht kohën të cilën ua shkurtoi vullneti i qytetarëve”, tha Kurti në konferencë.
Tutje, Kurti tha se presidenti Thaçi thirret në disa dispozita të Gjykatës Kushtetuese, por veprimet e tij tregojnë se janë në kundërshtim me Kushtetutën.
“Presidenti i Kosovës thirret në disa dispozita të Gjykatës Kushtetuese, por veprimet e tij janë në kundërshtim me nenet e Kushtetutës, ai u referohet disa aktgjykimeve të Gjykatës Kushtetuese, por, me këtë tregojnë se ai dhe stafi i tij nuk i kanë lexuar të njëjtat, apo mbase edhe nuk i kanë kuptuar, ku i dihet!”, ka thënë Kurti në konferencë për media.
Sot gjatë ditës, presidenti Hashim Thaçi, ka mbledhur përfaqësuesit e partive për të diskutuar rreth zhvillimeve të ardhshme që e presin vendin.
Presidenti thotë se shumica parlamentare që mund ta formojë qeverinë, do ta ketë mandatarin. Ndërsa VV’së, Thaci i shkroi letër disa herë, por kryetari Albin Kurti, nuk ia ka dërguar deri tash emrin e mandatarit.
Partia Demokratike e Kosovës ka qëndruar në distancë duke potencuar vazhdimisht se vendi i saj është në opozitë për shkak se doli e treta në zgjedhje.
Derisa partitë si LDK, AAK dhe Nisma kanë shprehur interesim të formojnë një koalicion për ta krijuar qeverinë e re.