Kryeministri i Kosovës, Albin Kurti ka dhënë një intervistë për gazetën e njohur zvicerane Tages-Anzeiger para udhëtimit për në Forumin Ekonomik Botëror që mbahet në Davos.
Në një intervistë për gazetarin Stephen Israel, një njohës i mirë i zhvillmeve në Ballkan, Kurti ka thënë se bota demokratike duhet të ketë kujdes ndaj “hegjemonisë pan-Sllavike” të Serbisë dhe Rusisë në Ballkan.
Kurti është përgjigjur gjatë për të gjitha temat, veçmas situatën në veri duke thënë se “popullata lokale serbe keqpërdoret nga Beogradi dhe disa kriminel të armatosur”
“Ne jemi gjithmonë të gatshëm për një dialog konstruktiv. A do ta pranonte Zvicra nëse një pakicë në vend do të udhëtonte me targa italiane apo franceze për vite me radhë? Shumica dërrmuese e serbëve në veri të vendit tonë nuk kanë asnjë problem me targat e Kosovës. Një grup i vogël shfrytëzohet nga Beogradi. Njerëzit e armatosur pas barrikadave nuk janë të interesuar për të drejtat, por për kontrollin e territorit në kufirin me Serbinë. Ata duan të mbrojnë veriun e Kosovës si zonë pa ligj. Ne kemi gërmuar gjashtë laboratorë droge atje dhe gjithashtu minatorë të bitcoin që kanë përfituar nga transmetimi falas. Askush nuk i paguan faturat e energjisë elektrike”ka thënë Kurti.
Kryeministri ka përmendur presidentin amerikan, Biden se “njohja reciproke duhet të jetë në thelb” të marrëveshjes së ardhshme Kosovë-Serbi.
I pyetur nëse është me e rënësishme për Kosovën BE-ja apo SHBA-ja, ai është përgjigjur
“Të njëjtën gjë ka thënë edhe Olaf Scholz, ku i pari është Biden. Por BE-ja duhet të mendojë nëse dëshiron të vazhdojë me “biznesin si zakonisht” me Serbinë dhe të vazhdojë të paguajë të gjitha subvencionet pa kushte. Beogradi nuk ka miratuar sanksionet kundër Moskës dhe merr gazin më të lirë nga Rusia. Për Beogradin, marrëdhëniet me Rusinë dhe gjithashtu me Kinën janë të parat. Kjo duhet të ketë një çmim”.
Sipas tij, “Serbia nuk është një vend normal sepse nuk është distancuar nga trashëgimia e kohës së diktatorit Slobodan Millosheviq”.
A mund të imagjinohet një konflikt më i madh si në vitet 1990? – Është pyetur Kurti nga gazetari.
“Do të ishte e papërgjegjshme të thuhet se nuk ka rrezik përshkallëzimi. Që nga sulmi i Rusisë në Ukrainë më 24 shkurt, ne kemi parë prova të hegjemonisë pansllave, siç janë stërvitjet e përbashkëta ushtarake midis Serbisë dhe Rusisë. Edhe disa qindra njerëz mund të shkaktojnë dëme të mëdha” ka thënë ai
Sipas tij, Beogradi synon autonomi për serbët.
“Në dhjetë vitet e fundit kemi nënshkruar 33 marrëveshje me Serbinë. Pothuajse asgjë nuk është zbatuar. Disa nga këto marrëveshje do të ishin edhe në interesin tonë, por Beogradi gjithmonë insiston në autonominë komunale. Pse mendon? Serbia dëshiron që Kosova, sikurse Bosnja, të ketë shtet në shtet me Republikën Srpska, pra të bëhet jofunksionale. I thashë Vuçiqit se nëse vërtet dëshiron të bëjë diçka për minoritetin serb, duhet ta njohë Kosovën. Ai nuk mund të thotë se Kosova është “shtet i rremë” dhe në të njëjtën kohë të ngrihet për autonomi komunale brenda këtij shteti. Është si të porosisni çaj pa filxhan. Ne nuk jemi budallenj” ka thënë ai./Prishtinapress/
