Kryeministri i vendit, Albin Kurti në një konferencë për media pasi e ka informuar kryetaren e Kuvendit të Republikës së Kosovës, Vjosa Osmani, lidhur me implikimet kushtetuese të shkëmbimit të letrave të datës 19 prill 2013, ndërmjet kryeministrit të atëhershëm, Hashim Thaçi dhe sekretarit të Përgjithshëm të atëhershëm të NATO-s, Anders Fogh Rasmussen, tha se këtë letërkëmbim nuk e ka gjetur në zyrë por ia ka dhënë një zyrtar i NATO-s, të cilin Kurti e falënderoi.
Kurti në një konferencë për media tha se është ish-kryeministri Thaçi ai i cili tha se nuk do të shkojë Forca e Sigurisë së Kosovës në veri në një letër, që nuk u pati bërë publike për deputetët e Kuvendit.
Ai tha se marrëveshja është mbajtur fshehtë dhe sipas tij është në dorën e deputetëve si do të veprojnë.
Kryeministri tha se ishte obligim i tij ta njoftoj kryeparlamentaren, deputetët dhe qytetarët e vendit.
“…Pra nuk është se ne do të ndërmarrim veprime tash. Ne duam marrëdhënie të mira me NATO-n dhe KFOR-in, por duhet t’i bëjmë transparente për ligjvënësit dhe qytetarët se nuk paska qenë vetëm një marrëveshje, por dy…”, tha Kurti, raporton Telegrafi.
Kreu i ekzekutivit të vendit tha se tashmë është në dorën e deputetëve dhe nuk do të paragjykoj si do të veprohet.
“Letërkëmbimin nuk e kam gjetur në zyrën time por më është dhënë nga një zyrtar i NATO-s. Duke iu falënderuar NATO-s edhe e morëm letërkëmbimin. Zyrtarët ligjor të Zyrës së kryeministrit dhanë opinionin juridik të cilin e kemi shpërndarë”, tha kryeministri. /Telegrafi/
